Kon ta lanta un Kooperativa?

Kada un kooperativa ta úniko den e manera na kual e ta operá. E pasonan deskribí ta varia i mester keda konsiderá komo indikashon.

#1. Identifiká e problema òf oportunidat, i e interes general ku e kooperativa por sirbí.
Un grupo ta eksplorá e nesesidat general ku ta eksistí pa sierto produkto òf servisio i ta identifiká e benefisionan ku un kooperativa lo por ofresé. E promé grupo akí ta aserká e komunidat en general pa haña un idea di kuantu interes ta biba pa un kooperativa asina, i yega na un definishon di e nesesidat komun. E grupo ta organisá anochi di informashon pa e posibel sosionan i ta probechá di e oportunidat ei pa reklutá mas persona ku tin e kapasitashon i eksperensia nesesario pa lanta e kooperativa.

#2. Lanta un steering committee i eksplorá e opshon di un negoshi kooperativista mas a fondo.
Si tin interes pa lanta un kooperativa, e grupo lo lanta un komishon pa sigui evaluá e opshon ei, hasiendo un sondeo bou di e posibel sosionan pa determiná kuantu interes tin i ki volúmen di negoshi por spera. E komishon ta kaba di definí e konsepto di e negoshi kooperativista, su mishon inisial, propósito i ophetivonan. E steering committee ta responsabel pa e parti finansiero, ta atendé ku informashon konfidensial i dirigí toma di desishon. E komité akí mester konsistí di hende konfiabel, ku tin sufisiente idea di negoshi, i ku lo laga interes di e grupo prevalesé riba nan interes personal. Pa hopi di e potensial sosionan di e kooperativa, ta kredibilidat di e miembronan di e steering committee ta determiná si nan lo sostené e kooperativa òf nò.

#3. Hasi un estudio di faktibilidat i evaluá e resultadonan.
E komité ta hasi un estudio di faktibilidat pa determiná si e kooperativa ta un negoshi faktibel den práktika. E estudio di faktibilidat lo wak si tin merkado pa e produkto- òf servisionan di e kooperativa nobo i si e lo por generá sufisiente entrada pa kubri e riesgo- i kostonan di e negoshi.

Un estudio di faktibilidat ta inkluí, entre otro:
Desaroyo di e kooperativa. Kisas tin mester di asistensia eksterno pa esaki. Hopi bes, e komité ta enbolbé un asesor (consultant) pa hasi e estudio di faktibilidat òf parti di dje. E asesor mester tin konosementu di e sektor empresarial en kuestion i e no mester tin ningun interes personal den resultado di e estudio. Na e altura akí, lo ehekutá e promé fase di un kampaña pa atraé sosio, pa asina por tin e kapital inisial pa paga pa e estudio di faktibilidat, e asesornan i demas gastunan enbolbí. Por tin otro fuente di finansiamentu disponibel pa e estudio, manera kooperativa eksistente, gobièrnu, NGO, banko di desaroyo i entidat sin fin di lukro. E komité mester presentá e resultadonan di e estudio di faktibilidat na e sosionan òf partinan interesá, pa disidí si lo dal bai ku e proseso di lanta e kooperativa.

#4. Lanta e kooperativa: Aprobá e statüt.
E komité, den kalidat di direktiva interino, por formulá e statüt, pero un notario ku konosementu di kooperativa lo mester revis’é. Si despues ta deseá di modifiká e statüt, esei tambe mester sosodé via notario. Fuera di esei, e Reunion General por stipulá i adaptá e reglamento interno di e kooperativa. Una bes ku e sosionan a lanta e kooperativa, esaki por habri un kuenta di banko pa e sosionan por depositá e pagonan di kapital i otro fondo.