Kooperativa di Artesano

Kooperativa ta brinda diferente benefisio na tur tipo di artesano i artista. Trahando huntu, nan por optené bentaha di merkadeo, hasi kompra kombiná pa haña deskuento a base di volúmen, kompartí ekipo i espasio den studio, i kontrolá distribushon di nan obranan. Artista di esenario ta usa e modelo kooperativista pa haña mas libertat artístiko i poder pa disidí tokante nan presentashonnan.

Un kooperativa di artesano òf artista, ta un organisashon ku ta den man di su sosionan i ku ta ser manehá demokrátikamente a base di un voto pa kada sosio. Normalmente, e sosionan ta elegí un direktiva pa tuma e desishonnan importante riba tereno di maneho, i ta kontratá un manager òf personal pa supervisá e maneho diario. Tin artista ku ta manehá nan kooperativa den forma di un empresa kolektivo, kaminda tur sosio ta sirbi huntu komo direktiva i e toma di desishon ta sosodé a base di e modelo di konsenso.

Mayoria di kooperativa di artesano ta wòrdu lantá pa por hasi merkadeo huntu. E miembronan di e kooperativa por haña mas ganashi for di benta di nan produktonan ora nan hasi merkadeo huntu, ya ku no tin nodi di paga un intermediario. Un artesano por bende su obranan via internet òf kompartí espasio di benta òf den un studio ku e lo no tabatin akseso n’e trahando e so. Diferente artesano por sera sèn pa kumpra hèrmènt kostoso, fòrnu i otro ekipo, i usa esakinan huntu. Artesano ku ta usa e mesun tipo di produkto i material por usa e kooperativa pa kumpra esakinan huntu i asina spar plaka debí ku nan ta kumpra un volúmen mas haltu. Si e sosionan ta deseá, nan por interkambiá asistensia tékniko, kolegialidat i krítika konstruktivo.

E tipo di kooperativa di artista i artesano ku mas bo ta topa ta den forma di un tienda. E modelo akí ta permití e miembronan hasi merkadeo huntu pa redusí e aspektonan ku ta tuma hopi tempu relashoná ku benta i promoshon di nan obranan, sin pèrdè nan independensia ni nan kreatividat i forma di ekspreshon úniko. E tienda ta ofresé e sosionan espasio pa merkadiá i bende nan produkshonnan. E artesanonan por uni forsa i kontratá un manager di tienda pa nan por dediká mas tempu na nan arte, òf nan mes por tuma diferente tarea na nan enkargo, bùrt pa bùrt.

Algun kooperativa di arte ta funshoná komo grupo di teatro òf di baile. E kooperativanan akí di artista di esenario ta den man i bou di kontrol demokrátiko di e artistanan, e direktornan, e ayudantenan di esenario i demas personal di e grupo. Un kooperativa di arte di esenario ta ofresé e artistanan sosio mas libertat artístiko i poder pa disidí riba nan presentashonnan, kompará ku un grupo mas tradishonal di teatro òf di baile.