Kooperativa komo hèrmènt kontra desempleo, hamber i pobresa.

E pandemia di COVID-19 ta afektando diferente sektornan di ekonomia nashonal i internashonal. E konsekuensianan sosial ekonómiko i finansiero ta grave. Prinsipalmente pa esnan sosial i ekonómikamente mas débil den nos komunidat. ekonomia a kremp ku alrededor di 19% i miles di persona a pèrdè trabou den prinsipalmente e sektor di hospitalidat.

Gobièrnu di Kòrsou huntu ku demas partinan enbolbí ta hasiendo esfuersonan pa por atendé ku e konsekuensianan sosial ekonómiko i finansiero riba término kòrtiku. Banda di esakinan ta importante tambe pa riba término mediano i mas largu tuma medidanan struktural pa yuda remediá e merkado laboral i di invershon. Den e kuadro aki Fekoskan ta konvensí ku awor mas ku nunka nos mester ta mas serka di otro, yudando otro i protegiendo esnan mas débil. Esaki ta e momento pa promové lantamentu di mas kooperativanan aki na Kòrsou, prinsipalmente den sektornan di produkshon i servisio. Kooperativanan ta un hèrmènt esensial den kreashon di trabou desente i kombatimentu di hamber i pobresa.

E modelo di kooperativa pa mas di 175 aña kaba a proba ku e ta un modelo resiliente i ku e ta brinda oportunidat di inklushon i di adelanto sosial ekonómiko i finansiero di tur gremio den un komunidat. Kooperativa no solamente ta un alternativa pero e por fungi komo motor di un ekonomia mas sosial i solidario.

Kooperativa aki na Kòrsou no ta un modelo deskonosí. Kooperativanan di spar i krédito, mihó konosí komo Credit Union, pa mas ku 60 aña kaba ta forma parti di nos ekonomia. Aktualmente mas ku 35.000 sosio (miembro) ta forma parti di un di e kooperativanan finansiero afiliá na Fekoskan. Banda di e kooperativanan finansiero tin tambe diferente kooperativanan agrario, di peska i di servisio ta funshonando aktualmente na Kòrsou.

Ta di vital importansia pa e sektor di kooperativa asumí liderazgo ekonómiko i sosial den e momentonan krusial aki. Pa añanan kaba, a base di e prinsipio number 6 di kooperativanan, esta ”kooperativanan ta yudo otro”, Fekoskan a bin ta duna un aporte na lantamentu di diferente kooperativanan den e sektornan agrario i di peska. Un di e retonan prinsipal di kooperativanan tabata ku no tabatin un kuadro di maneho integral ku ta salbaguardiá un desaroyo struktural i duradero di kooperativanan. Resientemente gobiernu di Korsou a aproba un maneho integral ku lo mester sòru pa un desaroyo struktural i duradero di tur tipo di kooperativanan na Kòrsou. E maneho aki ta ta basá riba e puntonan di salida di “Rekomendashon 193” di ILO. Segun e rekomendashon di ILO tur partner nan sosial, inkluso gobièrnu, mester hunga un ròl den desaroyo duradero di e sektor di kooperativa. Ademas di deliniá e ròl di kada partner sosial e maneho ta atendé ku diferente áreanan di atenshon i ta pone prioridat pa tur e akshonnan ku mester keda ehekutá pa por lográ establese kooperativanan di un forma struktural i duradero.

Fekoskan ta urgi gobièrnu pa atendé e implementashon di e maneho mas pronto ku ta posibel pa di e manera aki nos komunidat por hasi uso di e oportunidatnan ku kooperativa ta ofresé pa krea kuponan di trabou i kombatí hamber i pobresa di un forma mas struktural i duradero. Ta trahando huntu nos lo logra sali di e e krisis aki!

Pa mas informashon tokante di kooperativa i lantamentu di un kooperativa bishitá nos wepsait