Selebrashon di Dia Internashonal di Kooperativa

 Dia Internashonal di Kooperativa ta wòrdu selebrá tur aña riba e promé djasabra di yüli, ku pa e aña aki lo ta 7 di yüli. Meta di e selebrashon ta pa oumentá e nivel di konsientisashon tokante kooperativanan i duna mas informashon tokante logronan i idealnan di e movementu kooperativo. E dia tin ademas komo meta pa fortalesé i amplia lasonan di kooperashon entre e movementu kooperativo i otro aktornan, inkluso gobièrnu, na nivel lokal, regional i internashonal. International Cooperative Alliance (ICA), e organisashon mundial na kabes di kooperativanan, ta selebrá e dia aki for di aña 1923. Na aña 1995 Nashonnan Uní a rekonosé i afirmá e papel importante ku kooperativanan ta desempeñá den bida sosial, ekonómiko i desaroyo kultural. Pa e motibu aki Nashonnan Uní a proklamá e dia komo “Dia Internashonal di Kooperativa”.


Ròl di kooperativanan

E situashon di ekonomia global a demostrá kaba ku ta di vital importansia pa ta fleksibel i diversifiká pa por hasi uso efikas di e oportunidatnan nobo. Kooperativanan por kontribuí ampliamente na esakinan.

Aki na Kòrsou tambe kooperativanan por hunga un papel importante den e ekonomia di siglo 21.

E 7 kooperativanan mas grandi na Kòrsou ta kontribuí ku mas di 440 mion florin na nos Produkto Bruto Nashonal i ta duna trabou na mas ku 150 empleado. Den último añanan diferente kooperativa a keda establesé den sektor agrario i di peska. Awor ta un kuestion di krea e kondishonnan nesesario pa por sigui desaroyá e sektor.


Tempu pa kambio

Kooperativa a nase netamente komo un kontesta krítiko riba e modelo kapitalista. Na aña 1844, 174 aña pasá, e fundadónan di e promé kooperativa, na Rochdale Inglaterra, a proponé un modelo di organisashon sosial ekonómiko basá riba solidaridat. Nan a hasi esaki netamente durante un periodo di krísis. Meskos ku ta e kaso aworakí , e víktimanan prinsipal di e krísis tabata e sektornan i gruponan mas vulnerabel den e komunidat, prinsipalmente e hóbennan.

Fekoskan, e federashon di kooperativanan na Kòrsou, ta di opinion ku awor ta e momento pa traha i ehekutá plannan stratégiko pa kombertí retonan den posibilidat i krea oportunidat pa kambio. Mester ban profundisá i debatí tokante di i duna visibilidat na un ekonomia mas solidario i sosial. Mester elevá e konsenshi di un i tur ku ta anhelá un futuro duradero pa nos pais. Ta un bon momento pa aportá ku un modelo ku por kontribuí na, un distribushon mas hustu di propiedat, inklushon sosial ekonómiko i finansiero i un desaroyo sostenibel di nos komunidat.


Desaroyo sostenibel

Fekoskan, ta konvensí ku kooperativa ta un modelo importante i efikas den e lucha kontra pobresa. Kooperativanan ta uni hende den un forma demokrátiko i ta duna nan e oportunidat pa kontrolá nan futuro ekonómiko. Mas ainda ora ku tene na kuenta ku e benefishinan ekonómiko i sosial prosedente di kooperativanan ta permanesé den e propio komunidat i no ta sali bai eksterior. Por menshoná ehèmpelnan di rònt mundu kon kooperativanan ta kontribuyendo na realisashon di e Ophetivonan di Desaroyo Sostenibel (Sustainable Development Goals).

Sostenebilidat ta parti di e identidat di kooperativanan. E ta ankrá den e di 7 prinsipio di kooperativa esta, preokupashon pa komunidat. Kooperativanan tin 174 aña di eksperensia yudando na konstruí sosiedatnan sostenibel i risiliente rònt mundu. Por ehèmpel, kooperativanan agrario ta yuda dor di nan práktikanan konsistente na sostenibilidat di e medio ambiente. Kooperativanan di konsumo ta yuda nan sosionan pa yega na produktonan sostenibel i ta eduká nan kon pa hasi uso responsabel di esakinan. Kooperativanan finansiero ta kontribuí na stabilidat finansiero i akseso na produktonan finansiero pa gruponan mas vulnerabel den komunidat. Kooperativanan di servisio ta brinda akseso na servisionan vital manera transporte, bibienda i energia renovabel i sostenibel. Kooperativanan di produkshon tin komo ophetivo pa brinda produktonan i servisionan efisiente, ekológiko i na kuponan di trabou sostenibel. Aki na Kòrsou tambe nos tin e oportunidat pa desaroyá e tipo di kooperativanan aki e krea solushonnan sostenibel i duradero pa nos retonan aktual.


Plan di Desaroyo pa kooperativanan na Kòrsou

Fekoskan ta boga pa krea un plan nashonal pa desaroyo di kooperativanan nan Kòrsou. Pa medio di un plan integral gobièrnu por krea e ambiente i kondishonnan adekuá den kual kooperativa por desaroyá di un forma duradero. E plan mester tin tambe komo meta pa koordiná i kanalisá e diferente akshonnan ròndu di e desaroyo di kooperativanan.

Den e kuadro aki Fekoskan ta suprayá i sostené e intenshon di Ministerio di Desaroyo Ekonómiko pa duna atenshon struktural na desaroyo di kooperativanan. Alabes Fekoskan ta felisitá e Ministerio ku su miembresia asosiá na ICA. Esaki ta un oportunidat pa huntu ku e sektor di kooperativa traha riba e kondishonnan nesesario pa por hasi un mihó uso di e posibilidatnan ku kooperativa ta ofresé.


Responsabilidat di sektor di kooperativa

Fekoskan ta rekonosé ku e kooperativanan mes ta primeramente responsabel pa desaroyo duradero di e sektor. Kooperativanan eksistente i esnan emergente mester prepará nan mes mas mihó i fortales’é nan mes pa por hasi uso optimal di e oportunidat ku ta keda kreá i alabes pa por sostené otro. Di e manera aki nan por duna forma i bida na un ekosistema di kooperativanan ku ta kontribuí na kresementu sosial, ekonómiko i finansiero di nos pais.

Fekoskan den e kuadro aki ya kaba a kuminsá hasi e trabounan di preparashon di su organisashon interno pa asina por uni, promové, fasilitá i fortalesé kooperativanan den un forma muchu mas efisiente i efikas. Fekoskan a funda resientemente Curaçao Cooperative Academy ku, huntu ku partnernan stratégiko, lo bai brinda programanan di kapasitashon na e kooperativanan i nan sosionan. Den kuadro di esaki Tambe Fekoskan a firma un Memorandum of Understanding (MoU) ku entre otro University of Curaçao Dr. Moises Frumencio da Costa Gomez (UoC), Inter-Continental University of the Caribbean (ICUC), CENECOOP na Costa Rica, i Korpodeko. Tur esaki ku mira riba futuro desaroyo di e sektor di kooperativa.


Fekoskan ta felisitá tur kooperativa en partikular i pueblo di Kòrsou en general ku selebrashon di “Dia Internashonal di Kooperativa”.