Konferensia “Fortalesé e movementu kooperativa. Pa un desaroyo sosial ekonómiko duradero”.

FEKOSKAN ya pa 57 aña ta e Federashon di Kooperativanan di Spar i Krédito di Kòrsou. FEKOSKAN ta konsistí di un ret eksitoso di kontaktonan kooperativista, tantu riba nivel nashonal komo internashonal. Meta di FEKOSKAN ta pa yuda uni i engrandesé tur organisashon kooperativa di Kòrsou i asina fortalesé e movementu i e modelo empresarial di kooperativa riba nos dushi isla Kòrsou.

Dia 18 di òktober e mundu kooperativa internashonalmente ta selebrá e di 70 aña di dia Internashonal di Kooperativanan di Spar i Krédito (Credit Unions). Meta ta pa selebrá e espíritu di e movementu kooperativista, rekonosé historia, eksperensia, konosementu i logronan di sosionan. Rònt mundu afiliadonan di e movementu kooperativa ta selebrá e dia internashonal di Credit Unions na diferente manera.

FEKOSKAN, e organisashon madre di Kooperativanan, i Curaçao Cooperative Academy, un fundashon di FEKOSKAN ku ta enkargá ku formashon kooperativa, pa medio di esaki ta invitá bo pa bin selebrá huntu dia Internashonal di Kooperativanan di Spar i Krédito. Esaki lo tuma lugá pa medio di un konferensia ku ta konta ku partisipashon di diferente oradornan internashonal. Tema di e konferensia aki lo ta:

Lo trata diferente tópikonan relashoná ku desaroyo i fortalesementu di kooperativanan na Kòrsou. E dia di reflekshon lo tuma lugá dia 18 di òktober na Ouditorio di Banko Sentral di Kòrsou i St. Maarten di 07:45 pa 17:00 or. Minister pa Desaroyo Ekonómiko Dr. Steven Martina lo ta enkargá ku apertura ofisial. Despues ta sigui 6 charla presentá pa oradornan ku amplio eksperensia i konosementu den e movementu kooperativa internashonal i ku ta bini di Costa Rica i Puerto Rico. Nan lo papia entre otro riba e siguiente temanan ku lo keda presentá na Spañó:

“La Vivencia de los Valores y Principios Cooperativos”, “Diálogo y participación en las cooperativas”; “Comunicación, relaciones públicas y estrategia ante crisis”, “La Importancia de la Integración Generacional”; “Responsabilidad social y ambiental de las cooperativas”; “Equidad e igualdad de género en las cooperativas”.

Entrada ta kompletamente grátis. Mester tene kuenta ku lugánan ta limitá. Lùnch ta inkluí. Trahe ta “Business casual”.

Mester inskribí via di website di Fekoskan www.fekoskan.coop/event òf dor di tuma kontakto via di e-mail ku afrancisca@fekoskan.coop òf via di telefón 4623657.

No por registrá na porta i mester bini ku identifikashon pa por drenta Banko Sentral.

FEKOSKAN i Curaçao Cooperative Academy ta garantisá kada sosio di kooperativa i partisipante un dia di konferensha i di reflekshon fruktífero. Esaki a bira posibel danki na koperashon di: MEO, CCC-CA, i Credit Unions; ACU, UCU, KEP, KOBATA, KSKA.