Kon pa sigui despues di COVID-19?

Kooperativa komo hèrmènt kontra desempleo, hamber i pobresa.

1. Konsekuensianan grave.

E pandemia di COVID-19 ta afektando diferente sektornan di ekonomia nashonal i internashonal. E konsekuensianan sosial ekonómiko i finansiero lo ta grave. Prinsipalmente pa esnan sosial i ekonómikamente mas débil den nos komunidat. Ta premirá ku ekonomia lo por kremp ku hasta 11% i ku mas di 14.000 persona lo pèrdè trabou den prinsipalmente e sektor di hospitalidat.

2. Mas serka di otro.

Gobièrnu di Kòrsou huntu ku demas partinan enbolbí ta trahando riba un pakete di sosten pa por atendé ku e konsekuensianan sosial ekonómiko i finansiero riba término kòrtiku. Banda di esakinan ta importante tambe pa riba término mediano i mas largu tuma medidanan struktural pa yuda remediá e merkado laboral i di invershon. Den e kuadro aki Fekoskan ta konvensí ku awor mas ku nunka nos mester ta mas serka di otro, yudando otro i protegiendo esnan mas débil. Esaki ta e momento pa promové lantamentu di mas kooperativanan aki na Kòrsou, prinsipalmente den sektornan di produkshon i servisio. Kooperativanan ta un hèrmènt esensial den kreashon di trabou desente i kombatimentu di hamber i pobresa.

3. Kooperativa ta brinda oportunidat. 

E modelo di kooperativa pa mas di 175 aña kaba a proba ku e ta un modelo resiliente i ku e ta brinda oportunidat di inklushon i di adelanto sosial ekonómiko i finansiero di tur gremio den un komunidat. Kooperativa no solamente ta un alternativa pero e por fungi komo motor di un ekonomia mas sosial i solidario.  

4. Kooperativa na Kòrsou.

Kooperativa aki na Kòrsou no ta un modelo deskonosí. Kooperativanan di spar i krédito, mihó konosí komo Credit Union, pa mas ku 60 aña kaba ta forma parti di nos ekonomia. Aktualmente mas ku 35.000 sosio (miembro) ta forma parti di un di e kooperativanan finansiero afiliá na Fekoskan. Banda di e kooperativanan finansiero tin tambe diferente kooperativanan agrario, di peska i di servisio ta funshonando aktualmente na Kòrsou.

5. Liderazgo.

Ta di vital importansia pa e sektor di kooperativa asumí liderazgo ekonómiko i sosial den e momentonan krusial aki. Pa añanan kaba, a base di e prinsipio number 6 di kooperativanan, esta ”kooperativanan ta yudo otro”, Fekoskan a bin ta duna un aporte na lantamentu di diferente kooperativanan den e sektornan agrario i di peska. Un di e retonan prinsipal di kooperativanan ta ku aktualmente no tin un kuadro di maneho integral ku ta salbaguardiá un desaroyo struktural i duradero di kooperativanan.

6. Maneho pa desaroyo di kooperativa.

 Fekoskan den e lunanan tras di lomba ya kaba a duna un aporte supstansial na kreashon di un konsepto di maneho ku lo mester sòru pa un desaroyo struktural i duradero di tur tipo di kooperativanan na Kòrsou. E konsepto di maneho aki ta ta basá riba e puntonan di salida di “Rekomendashon 193” di ILO. Segun e rekomendashon di ILO tur partner nan sosial, inkluso gobièrnu, mester hunga un ròl den desaroyo duradero di e sektor di kooperativa. Ademas di deliniá e ròl di kada partner sosial e konsepto di maneho ta atendé ku diferente áreanan di atenshon i ta pone prioridat pa tur e akshonnan ku mester keda ehekutá pa por lográ establese kooperativanan di un forma struktural i duradero.  

7. Trahando huntu nos lo logra!

Fekoskan ta urgi gobièrnu pa atendé e konsepto di maneho mas pronto ku ta posibel pa di e manera aki nos komunidat por hasi uso di e oportunidatnan ku kooperativa ta ofresé pa krea kuponan di trabou i kombatí hamber i pobresa di un forma mas struktural i duradero. Ta trahando huntu nos lo logra sali di e e krisis aki!

Mas informashon.

Pa mas informashon tokante di kooperativa i lantamentu di un kooperativa por lesa e siguiente artíkulonan riba nos Blog “Kooperativa. É alternativa!”

Kiko ta un kooperativa?

Kon pa lanta un kooperativa?