Kon pa lanta un kooperativa?

LANTA UN KOOPERATIVA

Por distingui 3 fase durante e proseso di lantamentu di un kooperativa . Kada fase ta konsistí di diferente stap (aktividat) ku mester keda ehekutá:


Fase 1 - Desaroyo di e idea di e negoshi

Stap 1: Forma un grupo piloto

Stap 2: Hasi un estudio di faktibilidat


Fase 2 - Koordiná aktividatnan

Stap 3: Tene un reunion organisatorio

Stap 4: Kompletá plan di negoshi


Fase 3 - Organisá lantamentu di e kooperativa

Stap 5: Organisá e struktura interno di e kooperativa

Stap 6: Organisá e operashon empresarial di e kooperativa

6A: Planiá e operashon empresarial

6B: Planiá i organisá finansiamentu

6C: Rekrutá i trein personal

6D: Garantisá legalidat di e negoshi

Stap 7: Tene e promé Reunion General

Forma un grupo piloto

E promé stap pa lanta un kooperativa ta di bini ku un idea pa huntu solushoná un nesesidat òf deseo ekonómiko, sosial òf kultural. Por kompartí e idea aki ku mas hende. Di e forma aki por yega asina leu di forma un grupo di hende ku ta kere den e idea i ku ta dispuesto pa duna un aporte (finansiero) pa realisá e idea. Na momento ku tin sufisiente interes pa karga e idea ta forma un grupo piloto ku ta esun ku ta bai trèk e proyekto.

Hasi un estudio di faktibilidat

Durante e stap aki ta bai investigá si e idea di e negoshi ta realisabel. Pa esaki mester konsiderá diferente faktornan manera, potensial di merkado, análisis di kompetensia, trèntnan den e sektor, identifiká nesesidat di sosten tékniko, identifiká nesesidat di finansiamentu, identifiká si e kooperativa ta e mihó forma hurídiko pa realisá e idea, identifiká benefisionan pa miembronan i potensial pa atraé miembronan nobo, , etc. Si e investigashon no ta faborabel e grupo piloto por re-evaluá e idea. Si e investigashon demostrá ku e idea ta realisabel ta kontinuá pa e siguiente fase.

Tene un reunion organisatorio

Awor ku sa ku e idea ta realisabel ta bai kuminsá organisá e struktura di e kooperativa. Algun aktividat ku mester keda realisá ta por ehèmpel, determiná nòmber di e kooperativa, definí vishon i mishon, eligí un direktiva temporal, kuminsa hasi preparashonnan pa e statutonan i reglamentu doméstiko di e kooperativa etc.

Traha un plan di negoshi

E plan di negoshi mester duna un bista kon ta bai desaroyá, implementá, finansiá i manehá e kooperativá nobo. E ta un “blue print” pa hinter e proyekto pa lanta e kooperativa nobo. E ta eksigí basta preparashon pero e ta yuda organisá e pensamentunanan tokante e negoshi i e ta duna un bista realístiko di kiko por i kiko no por. Algun aspekto ku mester keda atendé den e plan di negoshi ta por ehèmpel, metanan stratégiko, proyekshon di gastunan, di invershon i di finansiamentu rekerí, evaluashon di senarionan, proyekshon di presupuesto, di fluho di kèsh etc.

Organisá e struktura interno di e kooperativa

Algun aktividat ku mester keda realisá ta por ehèmpel, desishon tokante e struktura di e kooperativa, e

tiponan di miembro, determiná ròl i responsabilidat di e órganonan statutario (reunion general, direktiva, konseho di supervishon), finalisá e statutonan i reglamentu doméstiko, rekrutá miembronan, organisá formashon i edukashon pa miembronan etc. Formashon i edukashon di e miembronan mester ta un proseso kontinuo den e kooperativa pa por garantisá desaroyo i kresementu duradero di e kooperativa.

Organisá e operashon empresarial di e kooperativa

Tin diferente aktividat ku mester wòrdu realisá den e fase aki. Ta kaba di regla e finansiamentu pa e kooperativa. Ta registrá na kámara di komèrsio, na ofisina di impuesto i ta pidi tambe pèrmítnan nesesario. Ta plania e aktividatnan operashonal pa e promé aña di e kooperativa. Ta negoshá kontratonan ku proveédonan i ku kumpradónan/distribuidonan. Ta rekrutá e personal nesesario pa ehekutá e trabounan diario. Ta buska i implementá un sistema di atministrashon si ta nesesario.

Tene e promé Reunion General

E último stap aki ta un refleho di e di 2 prinsipio di kooperativa. Ta yama e promé reunion general di e kooperativa. Den e reunion aki miembronan entre otro ta aprobá statutonan i reglamentu doméstiko, ta aprobá e plan di negoshi, ta eligí un direktiva i konseho di e  supervishon, ta instituí komishonnan etc.

FEKOSKAN por brinda konseho, guia i sosten durante kada un di e fasenan di lantamentu di un kooperativa.Tuma kontakto libremente ku nos ofisina.