DEFINISHON

E definishon segun International Cooperative Alliance (ICA):

"Un kooperativa ta un asosiashon outónomo di persona ku a uni boluntariamente pa satisfasé nan nesesidatnan i aspirashonnan ekonómiko, sosial i kultural pa medio di un empresa ku ta nan propiedat i ku nan ta manehá i kontrolá huntu den un forma demokrátiko."


Un kooperativa pues ta un asosiashon ku tin un empresa. Un kooperativa tin un dimenshon ekónómiko empresarial pero tambe un dimenshon sosial. E karakterístikanan aki ta hasi un kooperativa diferente for di kualke otro tipo di organisashon. Na e momentu aki tin 7 kooperativa di spar i krédito afiliá na FEKOSKAN. Huntu esakinan ta representá mas di 35.000 sosio.


Kontralí na empresanan tradishonal ku ta propiedat di un of mas invershonista, e doñonan (sosionan) di un kooperativa ta e klientenan nan mes di e kooperativa. Nan ta hopi enbolbí ku nan empresa, nan ta hasi uso di su produktonan i servisionan, nan tin benefisio di e kooperativa i nan  ta forma parti di e komunidat lokal.


DIFERENTE TIPO DI KOOPERATIVA

Tin diferente tipo di kooperativa. E modelo di kooperativa por wòrdu usá pa sirbi difererente tipo di propósito. I pa bisa bèrdat, un kooperativa por ta solamente eksitoso si e personanan ku ta forma e kooperativa a diseñá nan negoshi di tal manera ku realmente e ta sirbí nan propósito i nesesidatnan. Un manera pa distingui e tiponan di kooperativa ta dor di wak ta ken ta e sosionan di e kooperativa. Saliendo for di e punto di bista aki nos por distingui e siguiente tiponan di kooperativa:

Kooperativa di konsumidó

propiedat di konsumidónan/ klientenan ku ta kumpra serka òf ta hasi uso di servisio di e kooperativa. Esaki ta un di e formanan mas konosí. E miembro ta kumpra produktonan i servisionan ku ta wòrdu bendí, manehá i distribuí dor di e kooperativa. Nan por funshoná na diferente manera, por ehèmpel, komo un klup di kompra, komo un tienda (supermerkado, general store, meubleria etc,) òf komo un dunadó di servisio manera di internet, awa, koriente, televishon, transporte i rekohe sushi.

Kooperativa di produktor

propiedat di produktornan of artesanonan ku ta uni forsa pa produsí i bende nan produkshon. Esaki ta un di e tiponan di kooperativa mas komun. Nan ta konosí tambe komo kooperativanan di merkadeo. E tarea prinsipal di e kooperativa ta di komersialisá e produkshon di su miembronan i buska e mihó preis posibel riba merkado pa e produkshon. Kooperativanan di produktor ta inkluí entre otro kooperativanan di agrikultor, di artesano, di piskadó, di kriadó di bestia etc. E loke ku e benta di e produkshon generá ta na benefisio di e produktor.

Kooperativa di trahadó

propiedat di empleadonan ku komo miembro di e kooperativa ta brinda servisio pa e kooperativa. E propósito ta di krea trabou pa e miembronan. Mayoria biaha un kooperativa di trahadó ta brinda un of otro forma di servisio, por ehèmpel, kuido, limpiesa, konsultent, mensahero, distribushon di pakete, catering etc. Ta e miembronan mes ta esnan ku ta duna e servisio na klientenan na nòmber di e kooperativa. Un di e benefisionan mas grandi di e tipo di kooperativa aki ta ku ta e trahadó mes ta determiná maneho di e empresa. Otro bentaha ta ku ta trahadó mes ta e úniko ku ta benefisiá di loke e empresa generá.

Kooperativa multi-stakeholder

propiedat di diferente tipo di miembro, por ehèmpel di miembro konsumidó i miembro trahadó Esakinan ta un kombiashon di dos of mas di e tiponan di kooperativa menshoná anteriormente. Ku e modelo aki e miembronan ta trata di diversifiká riesgonan i ekspandé i bai operá den otro tipo di merkadonan.

Kooperativa di bibienda

E meta di e kooperativa ta pa proveé bibienda pagabel pa su miembronan. E miembronan ta hürdó/usuario di e bibiendanan. E kooperativa ta traha e bibiendanan i e miembronan ta hasi uso di esakinan pagando un preis mensual na e kooperativa pa kubri gastunan di fiansa pa konstrukshon, mantenshon, utilidatnan etc.

Kooperativa finansiero

E kooperativanan aki ta brinda tur tipo di produkto i servisionan finansiero na e miembronan, Nan ta konosí tambe komo Credit Union of kooperativa di spar i krédito. E servisionan ku nan ta ofresé ta inkluí entre otro hipòtek, fiansa personal, fiansa pa negoshi, planiamentu finansiero, seguro etc.

E ehèmpelnan aki ta reflehá solamente algun forma di kooperativa. Sinembargo tin vários otro posibilidat. Ademas, tur kos ta dependé si tin un nesesidat ekonómiko, sosial òf kultural komun.